政壇：孤寒財爺評分再插水

財政司司長曾俊華早前發表了新一屆政府嘅首份預算案，喺六百幾億元巨額盈餘下，鬍鬚曾毫不慷慨嘅出手令市民大失所望，尋日公布嘅最新民調就顯示，佢份預算案評分再度插水，逾五成八受訪市民話紓困力度不足，更有六成受訪者批評預算案「無功無過，少做少錯」，鬍鬚曾今年睇怕又要做甩鬚財爺囉！

闖立會勢打硬仗

年年計錯數再加上孤寒財爺嘅形象，令好多市民對鬍鬚曾今年份預算案都唔抱太大希望，只係估唔到失望都咁強烈啫。港大民意研究計劃喺二月二十八日至三月一日，即預算案發表後兩日，用電話訪問咗五百二十名市民，受訪者對預算案嘅平均評分跌至唔合格嘅四十九點五分，呢個評分較預算案發表當晚嘅即時調查再下跌四點一分。唔滿意預算案嘅有四成一受訪者，較即時調查急升咗十個百分點，表示滿意嘅人則跌七個百分點至只得兩成三。

至於市民對預算案嘅具體不滿，五成八受訪者認為紓困力度唔足夠，六成七受訪者認為香港嘅財富分配制度唔合理；僅一成九受訪者認為合理，同時有三成七受訪者認為本港嘅稅制唔公平。

鬍鬚曾做咗五年財爺，佢嘅預算案過去闖立法會嘅成績真係麻麻，今年要順利通過立法會，睇嚟又有一場硬仗要打，尤其家吓立法會拉布風盛行，最善於發動拉布戰嘅激進勢力已經嗌出回水一萬蚊嘅口號，家吓鬍鬚曾份預算案只係公布一個禮拜，評分已經跌完又跌。

少做少錯，係唔少官場中人嘅口頭禪，但如鬍鬚曾嘅掌櫃哲學都抱呢種觀點，咁香港人就慘嘞。