SUN搞作：打橫嚟講：扯旗愛國問自己

梁振英為答謝各方有力人士的大力支持，佢當選香特之後，向全港十八區各分水一億公帑，任用！區議會議員最鍾愛起地標，咁又係！有冇藝術品味係另一件事，有工程開展，政府又肯科水，促進社會經濟活動，等人有錢落袋，才最要緊，怎可不贊同！

深井「肥鵝」，油麻地「大舊玉」及金魚街「金魚」雕塑，叫人眼冤想死，被全港七百萬人「嘟」爆，嚇得本來動工嘅旺角「女人指環」（其造型似棺材戙直），煞掣急停。大家以為呢「舊」阻街唔老利嘅偽術垃圾已掟去堆填區啦！殊不知，油尖旺區議會陳少棠仲未死心，還想「抬番個棺材」出嚟？並推說地標名稱唔係「女士指環」，個名待本月十五日開會商討。

點解啲弱智區議員咁鬼鍾意搞啲無認受性嘅低能醜事o架呢？嗱！港島上環西港城附近嘅文化廣場，好端端，已有一件象徵沙士期間港人團結精神嘅雕像，家吓，被中西區議會喊拆，改放凸顯「發大財」嘅「首飾箱」新雕塑，咁未算PK！呢度畀建制派主導咗嘅區議會，更準備動用四百六十萬元起一個小天幕，同兩支旗杆，分別畀中國國旗和香港區旗作扯旗之用。唉！使唔使分分秒秒要香港本地人「心繫家國」呢？點解啲靠口說愛國嘅投機分子，成日講到香港人好唔愛國，係要日夜攞支五星旗出嚟扯吓！要人睇到認愛國為止呢？

老老實實，以面積比例作計算，香港特區內扯起的五星旗肯定多過大陸。嗱！大家返內地，除咗過關時，幾時會喺路邊見到有呢支國旗o架呢？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府