SUN搞作：少膽虫手記：騎呢生活態度

財政預算案一出，全港市民鬧爆財爺，又鬧佢估錯數，又話佢守財奴。其實，少膽虫反而好同情佢，點解咁講？少膽虫絕對唔係要幫佢開脫，而係因為少膽虫敢同大家講句，如果同淫賤黎比，財爺算係老幾？少膽虫喺《爛果》做咗N個寒暑，淫賤黎有咩「生活態度」少膽虫係未見過o架，少膽虫依家就冒死同廣大嘅讀者分享兩件舊事。

記得少膽虫初入《爛果》，未做老腫嘅時候，同淫賤黎日做夜做，做極都係個編輯仔，人工又無得加，但眼見其他人咩都唔使做，行行企企，反而紮得好快。終於有一日，少膽虫忍唔住走入淫賤黎房問佢點解，佢拍一拍少膽虫膊頭，講咗句︰「要遙望繁星，但要腳踏實地。」少膽虫一聽，火都嚟埋，心諗︰「同你講依家，講咩星呀，鬼咁遠，丟……那星，同我講番正事，唔該！」後來少膽虫經過多年嘅浸淫，終於知道要喺《爛果》上位，唔使做嘢叻，最緊要係識擦淫賤黎鞋，少膽虫亦憑住多年嚟嘅「幹勁」，最後都擦出頭來。

除咗九唔搭八之外，少膽虫仲記得金融海嘯嗰陣，淫賤黎唔知抽咗邊條孖筋，突然話要減大家一半人工，話要大家同《爛果》共度時艱喎，但減咁多，只會搞到人人無心機「作聞」，結果啲回紙多到成個壹全霉都擺唔落咁滯。少膽虫知道再係咁落去，自己一定會窮死，於是少膽虫本住魏徵嘅決心，向淫賤黎「死諫」。

少膽虫連同幾位壯丁，一身披麻戴孝，托住個裝滿《爛果》回紙嘅棺材，浩浩蕩蕩由公司門口行去淫賤黎門口，沿途人人都向少膽虫報以「烈士」同「一路好走」嘅眼神。幾經辛苦，走到去淫賤黎門口，大家「嘭」一聲放低個棺材，然後大叫︰「以前嘅老細，返來囉……」誰不知淫賤黎行出嚟，竟然只係講咗句︰「你有你嘅生活，我有我嘅忙碌，我依家就忙住歎咖啡、睇法國嘅愛情動作片，你哋就慢慢搞喇！」突然之間，一位編輯大叫︰「老細，你咁做係錯o架！」呢一句嚇到全場人靜晒，因為稍為有少少經驗嘅編輯，都知道喺《爛果》咩都可以講，就係唔可以話淫賤黎錯，塊面嬲到紅過關公嘅淫賤黎，即刻引用前人名句，大聲咆哮︰「If I am wrong, I am wrong in the right way.」

第二日，少膽虫再無見過嗰位編輯，相反淫賤黎就笑騎騎同大家講︰「話我錯，其實都係讚美。好喇！見大家咁支持我，我心情大靚，人工方面就減少啲喇！」

一班編輯只好無奈地苦笑，仲要拍手附和，但係「錯」呢個字就再無喺《爛果》嘅編輯部聽到……面皮厚成咁，少膽虫對淫賤黎真係佩服得五體投地囉！

少膽虫