政壇:搞搞政:謝偉俊黐革新會吸樁腳

除咗泛民主派政黨政團暗地裏展開整合外,建制派陣營亦開始有異動。消息指外號「西環契仔」Paul謝偉俊,最近靜靜起革命,有意喺今年年中前搞吓講座、活動等熱身,之後會搞個智庫形式嘅平台,明眼人都睇得出係想箍實啲地區樁腳同吸多啲新血,但最耐人尋味嘅係,聽聞阿Paul初步接觸嘅人當中,行得較埋嘅係革新會成員黃博度。

翻查網上資料顯示,革新會係已故御用大律師貝納祺喺一九四九年創立,起初唔少革新會成員都係市政局和早期區議會選舉嘅主要成員,另外較為熟悉嘅成員係樹仁大學創辦人胡鴻烈。

事實上,革新會近年都絕迹於立法會同區議會選舉,今次阿Paul同黃博度行得咁埋,莫非隱含住活化革新會嘅先兆?阿Paul接受查詢時笑言倘活化到都無所謂,又承認黃博度係新平台嘅「台柱」之一,至於具體進展就以籌劃中為由無再透露。

雖然詳情欠奉,但至少佢有意做好地區工作,事關佢最近抽到兵家必爭嘅牛頭角下邨辦事處,聽聞之後佢仲想再下一城,進駐較多中產嘅藍田開多個辦事處添!

第一手消息請下載on.cc東方互動iPhone/iPad/Android/Windows Phone Apps

設計圖片