政壇:英祿訪港接見 黃耀中「泰」驚喜

泰國首位女總理英祿(Yingluck Shinawatra)日前旋風式訪港兩日,期間到過禮賓府與特首梁振英進行雙邊會談同簽訂合作協議。英祿今次來去匆匆,但原來佢喺排到密麻麻嘅行程中,曾加插同一班香港旅遊業界代表會面嘅環節。旅遊業議會總幹事董耀中日前接受電台訪問時坦言,英祿身為一國元首,竟然會撥冗接見佢哋,令佢哋受寵若驚,興奮莫名。

阿董憶述,當日會面係由英祿主動提出,香港泰國旅遊局穿針引線,本港十幾間同泰國關係密切嘅旅行社代表獲安排喺早上十一點,喺港島某酒店會見英祿,全程約四十五分鐘。佢透露,英祿接見業界嘅目的,係想了解吓本港旅遊業界對泰國有乜睇法,希望推動更多港人遊泰,同埋帶畀佢哋新思維,優化泰國旅遊業。

時間雖短 意義重大

佢形容今次會面可謂史無前例,一個國家領袖主動邀約本港旅遊業界,時間雖短但意義重大,標誌住泰國對香港嘅高度重視。由於機會難逢,大家紛紛向英祿提出意見,例如指出泰國導遊老化,希望未來培訓多啲年輕導遊;開拓更多泰國新景點、改善交通擠塞等。佢盛讚英祿作風親切,整個會面中靜心聆聽,更承諾回到泰國後會盡快跟進處理問題。

在任總幹事十六年嘅阿董仲大爆喺未入旅議會之前,曾任職兩間航空公司共三十載,原來佢當年毅然跳槽,內心曾經多番掙扎,更一度四出求神問卜,最後都係決定轉換新工作環境。佢現年六十三歲,任期年底屆滿,佢笑稱自己仲後生,願意繼續貢獻畀旅遊界。睇嚟佢仲想encore喎!

第一手消息請下載on.cc東方互動iPhone/iPad/Android/Windows Phone Apps

英祿(右)訪港期間,與董耀中及多名旅行社代表會面。

設計圖片及對白