SUN搞作：少膽虫手記：傻佬憶舊

呢排少膽虫覺得周身唔聚財。鬼咩！日日返到公司都接到啲細嘅大信封。想請人，又因為淫賤黎一向吝嗇成性，用賤價剝削fresh grad，所以登咗報紙請人成個月，連條毛都請唔到。咁樣落去，容乜易淫黎發「癲」威捉少膽虫入房糟質自己o架？

喺香城打工，就要受腦細氣，日日異化勞動，無咗自己。少膽虫不知幾掛住後生嗰陣，靠擦Professor鞋拎船去英國讀咗成年書嘅日子。每日成個十九才子咁樣，坐喺康河隔籬，一邊睇鬼妹划船、一邊讀手上嘅Hayek，吸收吓天地靈氣。間唔中好似《In To The Wind》咁，孭背囊做浪人去旅行。少膽虫出身香城，細個受盡中華文化薰陶，受晒封建專制嗰套；出到去先知世界咁大，從而對西方嘅公平自由心生渴慕。喺外國，年輕人可以揀自己鍾意嘅生活，社會可以容忍畢咗業嘅後生唔搵工，放蕩幾年，慢慢諗自己將來。你可以喺德國自由塗鴉、喺法國打工度假、喺西班牙耕田，西人見到你形單影隻，甚至會好人到請你返佢屋企免費住宿！嗰一年，少膽虫真係歎到唔想返香港！

最後因為少膽虫無料到，考試科科肥晒，咪逼住返香港搵工囉！因為Hayek令少膽虫邂逅淫黎，從而展開一段孽緣。又因為幫香城啲HIHI腦細打工，少膽虫非但唔可以好似西方年輕人咁做自己，每次勇抒己見，啲人都會當你係異類猛咁小。唉！講開又講，編輯部嗰位有廿四分之一英國血統嘅阿Kiss就走，問心少膽虫都覺得佢要走嘅……留喺度，咪又係重蹈少膽虫嘅覆轍！哎呀，咪住，睇佢都無我咁醒o架喇，至少佢唔肯賣屎忽先啦！

少膽虫