SUN奇古怪：Sun潮語【吹雞】

「雞」係一種家禽，幾千年前已經開始飼養供人食用。「雞」嘅食法千變萬化，古今中外，夾夾埋埋都有成千上萬種有關於雞嘅食譜。喺華南粵語地區，「雞」除咗係家禽之外，當然仲有另一個意思。普通話「妓」和「雞」十分相似，所以廣東人會將妓女嘅「妓」稱為「雞」。普通話「召妓」，用廣東話去講，會講成「叫雞」，因「召」和「叫」嘅普通話發音亦相當近似。關於「雞」嘅潮語或俗語都好多，例如之前喺本欄介紹過嘅「小學雞」，或者形容一啲渣嘢，可以用「弱雞」。賭錢有「抌雞」，即係有料扮無料，氹對手落疊。其中「吹雞」，就係一個比較常用嘅雞類潮語。

「吹雞」本來係一個廣東話俗語，意思係吹哨子，又即係吹BB。可能哨子聲同雞啼一樣吵耳，因此香港人習慣稱呼哨子做「雞」。但潮語「吹雞」嘅意思就完全唔同，依家講「吹雞」其實係指召集咁解，即係Call齊人準備做嘢。

「吹雞」最先係香港幫派社團術語，每次進行打鬥或顯示實力嘅時候，「大佬」就會「吹雞」召集幫派兄弟，準備與對方一較高下。因為做細嘅，一定要聽大佬支「笛」，大佬鳴笛「吹雞」，做兄弟嘅唔使問點解，二話不說就要出嚟撐大佬。時至今日，「吹雞」已經變成潮語，亦非大佬嘅專利。但凡需要兄弟姊妹朋友老友幫手嘅時候，都會「吹雞」搵幫手。

有時又唔一定係做嘢先要「吹雞」，Call人去飲酒食飯聚會燒嘢食去玩，都可以叫做「吹雞」。有時遇着一啲大事，唔止要「吹雞」，仲要「吹大雞」，即係全體總動員咁解！例如有人話要搞「佔領中環」爭取真普選，就肯定要吹好大隻雞先得。不過到時到底有邊位有咁大號召力，可以夠分量吹得響呢隻雞就不得而知。不過用前排反國教運動為例，一班細路都可以吹到十萬人出嚟，呢個世界邊個先係「大佬」？有時真係話唔埋。