政壇：搞搞政：葉建源通識弱論壇瘀爆

教育界嘅立法會議員葉建源雖然係議會新丁，但幾個月議員生涯都冇乜大失誤，尋日佢出席一個預算案論壇時，準備充足咁攞埋powerpoint出席，弊在佢開壞頭，先係開錯檔，跟住又唔識轉版，搞到被人瘀：「立法會議員對資訊科技嘅掌握可能係比較差嘅。」

電腦失誤之後，有觀眾大嘆香港做得太少藝術教育工作，建議政府應該多撥資源普及藝術，並多做創意藝術教育，言談中提咗句普普藝術（pop art）大師安迪華荷（Andy Warhol），輪到葉建源回應時，佢唔知係聽唔清定係唔識，又爆一句：「咩『荷』話？」台下唔少人都心頭升起疑問，究竟呢個教育界立法會議員係通識唔夠？定係資訊科技知識不足？又或者加埋聽力都唔夠呢？

不過，葉建源回應教育資源時就從容不迫，直斥政府對教育界資源投放不足，令好多教師未有受過藝術教育培訓，仲話可能大家小學時教視覺藝術嗰位老師，極有可能好多都冇讀過視覺藝術o架。