政壇：黃以謙入建仔覓官場路？

政壇路兜兜轉轉，九龍城區議員兼精神科醫生黃以謙入過自由黨，去年應徵過食物及衞生局副局長、又參選過立法會，可惜最終無功而還，近來又有新動向，即將加入民建聯。建仔有唔少黨員都成功加入政府做官，黃以謙今次入黨，會唔會諗住有較大機會加入政府做官呢？

黃以謙尋日現身建仔九龍城支部新春團拜，支部主席徐紅英致辭時就同街坊透露黃以謙即將加入嘅消息，坐主家席嘅黃以謙跟住亦有份上台做主禮嘉賓切燒豬，場面真係好似一家親咁，我哋問過黃以謙幾時同建仔接觸嘅，佢就話依家仲未成事，唔想喺度講喎。