政壇：老鴿遊非洲獅口餘生

出門旅行，好多人都試過驚心動魄嘅事，近排熱氣球嘅安全性廣受關注，政圈中原來唔少人都試過，白鴿黨嘅張文光同單仲偕（單雞）就試過去非洲肯尼亞旅行，一行人好開心咁搭熱氣球升空、鳥瞰非洲大陸嘅雄偉神奇，但係開心之後卻驚險萬分，因為熱氣球降落時，吊籃竟然傾側咗，坐喺裏邊嘅人嚇出一身汗之外，仲有驚嚇喺後面，因為有隻非洲雄獅喺佢哋降落唔遠嘅地方出沒，險過剃頭！

事隔多年未驚完

張文憶述，十年前，佢同黨友單雞曾經一齊遠赴東非肯尼亞，當時一齊出行嘅仲有佢太太、囡囡，加埋單雞兩父子。去到肯尼亞，必定會欣賞非洲大草原嘅野生動物狩獵及草原日出嘅美景，坐熱氣球屬必然之選。

張文仲記得當時大家坐上熱氣球，駕駛員就向佢哋自稱有飛機師牌照，仲攞出嚟向佢哋展示，希望一眾人安心喇，據張文話，佢哋坐嗰種熱氣球只坐得幾個人，運載量少好多。睇完玩完之後，熱氣球降落時卻唔多順利，成個吊籃傾側，搞到佢哋好似滾地葫蘆咁碌咗出草地，險象環生。幾百呎外正好有隻獅子狼吞虎嚥食早餐，如果呢個時候獅子發狂，佢哋真係匿都冇得匿。好彩，個司機即時載走遊客，各人亦免於成為獅子早餐。事隔多年，張文講起仍然心驚驚，話好牙煙。