SUN搞作：少膽虫手記：放蛇唔容易

近來，本欄似乎說多了壹全霉內部的無聊事，少說了報業軼聞。今天少膽虫決定撥亂反正，說說有關採訪的事兒。

做傳媒的，總難以事事光明正大去問，特別是壹全霉專門挖人陰私，更是困難。總不成親口問：「阿陳生，你到底有無為咗一己私利，逼你個女出嚟做吖？」所以這時候，放蛇就成了傳媒的利器。

為了讓編採間能互相了解彼此工作，淫黎要求少膽虫派一名編輯去嘗試放蛇，更指名道姓，要讓他的寵兒肥仔明去試，「虫，你聽日叫明bb去試吓放蛇，事成之後，莫講話A1，副主任都有得佢做！」少膽虫一聽心知不妙，我用了十年由財經記者做到《爛果》老總，已經算快，依家肥仔明入嚟無耐，已經做A1，仲要再升，容乜易做埋我個位？好彩少膽虫久經風浪，人急智生，已諗出一計，即刻同淫黎講：「無問題！我睇好肥仔明o架！」嘿嘿，我睇好，睇好你個肚腩會愈嚟愈大囉！

如此這般，肥仔明尋日就拎住兩罐奶粉，試過關──當然無咁易，少膽虫已經將一罐分量嘅奶粉，硬塞入佢條腸到，睇吓會唔會畀海關捉到。至於點塞？嘿嘿，你懂的。

肥仔明由堆填區出發，一副「壯士一去兮不復還」嘅衰樣，睇到少膽虫喺心入面大笑不止。呢個世界上，將奶粉沖水飲嘅人就大把，但係原罐隊入腸，怕且佢都係第一個囉。

雖然話拎《爛果》記者證，出咗事畀人捉到都可以解吓畫，但係肥仔明依然驚到腳都震埋。少膽虫由針孔鏡頭望住佢面青青個衰樣，真係爽無可爽。最慘嘅係，一個咁有「分量」嘅肥仔，因為驚啲粉流出嚟唔敢坐，被迫要膝頭哥承受重量，又畀來來去去嘅人猛撞佢全身上下肥肉，發出響亮嘅「啪啪」聲，真係睇到我忍唔住笑。

玩時玩，少膽虫都驚糟質淫黎嘅寵兒，淫黎會唔高興，於是斜眼一望淫黎，點知佢聽到啲「啪啪」聲之後面色紅潤，呼吸急促，鬼死咁興奮。唉，上樑不正下樑歪，有得淫黎呢啲淫樣老細，難怪《爛果》會成日宣淫。

去到關口，肥仔明就要過機，照吓佢有無收埋奶粉，一照之下，果然畀人發現佢成肚都係粉，只見肥仔明大驚之下拔足狂奔，一路跑一路漏粉，佢又跑得慢，終於畀人一把撳住，連針孔鏡頭都爛埋……

肥仔明放蛇成唔成功，就真係不得而知，不過，咁多粉喺條腸入面，肯定大瀉數星期──嘿嘿嘿，一條「粉腸」，就搞掂呢件明日之星，薑，又點會唔係老嘅辣？