政壇：政商定格：梁高美懿帶定川貝上京

全國人大政協兩會即將揭幕，北京連月霧霾不斷，又刮風沙，連外國人都將「北京咳」列為北京旅遊特色，新一屆港區全國政協委員尋日忙上京，驚唔驚上去吸毒氣o架？佢哋大都準時喺朝早十點半鐘拖住篋抵達機場準備搭十二點半嘅機，據聞係西環落「柯打」叫啲政協新丁準時集合，但有人另搭遲一啲嘅機。

政協新丁前恒生銀行女大班梁高美懿就冇聽西環「柯打」，十一點十分先至抵達機場，佢話今次上京帶備潤膚霜補濕同川貝潤喉。另一政協前政務司司長唐英年更加選擇搭下午三點鐘班機，應該上到去就夠鐘食晚飯。上京開會一族各有準備，但福建幫頭領盧文端就帶備一大箱貴州茅台酒上京宴客，莫非好似傳聞所言，佢驚被上面啲飯店劏到一頸血？