政壇：搞搞政：陳維安考船牌兩觸礁

立法會秘書長陳維安（Kenneth）左手跌斷，打咗六個星期石膏，原因係舊年聖誕節同家人去新西蘭度假，玩靠人體重心驅動嘅兩輪車Segway時不慎趺斷左手腕骨。點知佢呢頭啱啱好啲，佢原來早已開始另一項玩意，佢同囝囝一齊玩靠風力航行嘅帆船，仲參加咗考試添，可惜兩次都「肥佬」觸礁，四月份佢會再參加補考，誓要揚帆出海。

佢尋日同傳媒聚會，自爆好想學揸船，所以去學去考，成個考試分兩個部分，船長試佢僥倖合格，但大偈試就「肥佬」收場，所以四月份要再嚟過。Kenneth話，佢學揸船目標並唔係想遠洋航行，只係想喺香港水域兜番幾個圈，或者由港島揸船去九龍喎。

埃及樂蜀熱氣球意外引起全城關注，鍾意玩唔同運動嘅Kenneth就話自己雖然鍾意玩，但一向好少玩呢啲極限運動，之前去外地旅行時，都遇過有笨豬跳、滑翔翼等極限運動，佢同兩個囝囝因都驚有危險唔敢玩，反而太太竟然玩滑翔翼，事後諗番，Kenneth都驚嘆老婆仲大膽過自己。