政壇：警官外訪齊齊坐經濟位

警務處處長「一哥」曾偉雄平時個樣木木獨獨，估唔到佢原來係冷面廚神。佢尋日同傳媒午宴時話自己最叻煮西式「快餐」，正當大家估緊「一哥撚手快餐」係煎腸仔定煎蛋之際，先發現佢嘅時間觀念有異於常人，因為佢嘅「快餐」係要等個半鐘先有得食。

一哥呢味「個半鐘快餐」就係紅酒炆牛肉或羊肉，唔用紅酒亦可用白酒。

調味方面，一哥話醃料可免，重點係比畀時間將湯汁慢慢收乾，用中慢火炆個半鐘，之後撒少少海鹽，再加少少糖吊味，個半鐘就有得食。一哥話請人食飯唔使豪華，首重誠意，而警隊外訪亦都以實而不華做大原則。

講到實而不華，佢又透露，好似近期警隊外訪新西蘭就拒坐商務客位，搞到空姐見到咁多阿Sir排排坐經濟客位都打咗個突。原來商務客位貴經濟客位足足兩倍，呢個安排係為咗令有更多同袍有機會到外地交流，相比廉政公署大花筒豪華外訪，警隊算係慳家喇。