政壇：立會秘書處三招抗拉布

立法會財務委員會面對泛民主派提出嘅一百九十幾萬條修訂抗衡「剪布」議案，尋日立法會秘書處搞咗個傳媒聚會，順便集思廣益點樣拆招，最後竟諗出「剪布」三招，包括財委會主席張宇人手起刀落狠狠裁定百幾萬項修訂無聊瑣碎、報警投訴泛民不誠實使用電腦，而第三招必殺技就係規定議員要白字黑字親筆簽名提交修訂議案，迫使班泛民議員知難而退。

搞成咁，皆因近二百萬個議案要用四百零八個月先可以審核完畢，兼且要花二百日去表決。不過，尋日有啲剪布建議就創意十足，譬如有人建議最直接嘅方法就係叫張宇人學吓立法會主席曾鈺成咁狠狠「剪布」，裁定議員嘅修訂瑣碎無聊而不獲接納，但如果立此先例好易孭鑊；另外有人話，橫掂都開唔到啲修訂議案電郵，不如報警話立法會電郵被侵襲，等警方拘捕行動嘅中堅分子社民連「長毛」梁國雄。

最有得諗嘅都係修改議事規則，要求議員提交議案一定要用白紙黑字，仲要每份親筆簽名，提交時仲要親身到秘書處讀一次核實。咁樣近二百萬個修訂，提出者簽名都簽到手軟啦，加上大量影印既唔環保又會浪費公帑，或者泛民因為各方壓力太大會收手呢！