政壇：胡志偉嫌貴唔赴韓考察

立法會議員不時有外訪安排，過去唔少行程都被指藉外訪、考察之名豪遊歎世界，新一屆立法會復會唔夠半年，已經先後有兩個外訪團成行。早兩日我哋先講過環境事務委員會喺復活節有個韓國首爾考察團，四日旅費原來高達一萬七千五百蚊，有啲議員好有興趣，但白鴿黨胡志偉就嫌貴，決定褪軚，留番津貼參加其他活動。呢件事暴露兩大問題，一係議員都嫌豪，外訪團嘅成本係咪高得滯呢？另一個問題就係究竟議員係按工作需要去考察、定係按成本決定執唔執行呢項公務呢？

KK突然有興趣

呢個環保之旅主要係向首爾市處理垃圾、環保減廢等取經，內會尋日討論首爾考察之行時，雖然環境事務委員會已經有十幾位議員報名，但非委員會成員嘅民協馮檢基（KK）突然間話有興趣去，搞到內會最終決定要再傾吓先。

有議員忽然有興趣，亦有議員本來話去但又褪軚。事關白鴿黨嘅胡志偉嫌一萬七千五百元團費太貴，佔咗一屆會期、議員享有五萬五千元外訪津貼嘅三成，為免今次花費太多，胡志偉決定留番啲津貼下次去遠啲喎。咁都得？究竟佢哋係因公考察，定係因私去旅行，目的地都要揀遠啲？

另一個外訪，係英聯邦議會聯合會英國分會每年邀請立法會議員去倫敦威斯敏斯特議會參加工作坊，今年嘅工作坊將會喺六月十七至二十七號舉行，工作坊只得兩個名額，但有七位議員報名，結果帳委會副主席、會計界梁繼昌（Kenneth）、同帳委會內建制派葛珮帆（EQ）中選。