SUN搞作：打橫嚟講：一層樓，比婚姻更重要？

一個廢柴政府之不堪，讓民眾唾罵，源自政策的邏輯矛盾荒謬，高層官員決策者的思路紊亂，前言不對後語，各局各自為政，一係爭功互片，一係卸膊互推。阿頭冇料到，下屬擦鞋狗，十幾廿萬個公務員出糧中，有幾多件仆心仆命為社會大眾？嗱！撫心自問吓啦！

負責經濟金融的官員，不停口話香港特區樓價有升無跌，是因為「無地起樓」，遂不惜四出強搶豪奪，不特只搞慶大學校長以辭職作對抗，連老人院宿舍和天橋底亦唔放過。查實，家陣，新樓的空置率奇高，即反映有樓無人住的實相，仲起咁多新樓把七咩？

好「嘟」把火的，係政府官員超級折墮地說：「四百萬嘅樓，係窮人恩物。」吓！試想吓！齋四百萬大元，唔計利息，手續費和裝修費，叫一個月入兩三萬元嘅小家庭，要供幾耐先甩身呢？唔食唔使唔生仔，兩公婆分分鐘要捱二、三十年。一對廿多歲的小夫婦，供滿層樓時，唔死，都已經係半百長者矣！到那時，該物業又話係「舊樓」，唔拆也須夾錢大維修至住得，如斯境況，一定會發生的！點算？當全港市民都明知「一層樓」是一個比婚姻更大責任，甚或負擔時，呢個廢柴政府何解未有計安定民心？只懂用語言偽術蠱惑人心，呃得一時得一時！

財政司今日口噏新一份《財政預算案》，咪畀我睇死，唔慌會有好嘢。香港唔係要短期的小恩小惠小甜頭，而係想有長遠少少的前景。不停派爛菜救濟，不如畀機會大家種菜啦！

唔偷唔搶老老實實的，唔知幾時才搵到四百萬元？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府