政壇：政商定格：英祿帶囝囝金鐘掃靚篋

泰國首位女總理英祿前日抵港展開兩日旋風式訪問，尋日朝早佢先到禮賓府同特首梁振英（CY）進行雙邊會談，並簽訂合作協議。轉個頭，衫都未換，就帶同家人去金鐘太古廣場掃貨，貴為國家元首嘅英祿，即使低調行街都有至少十名保鏢隨行，本港警方更安排多名G4（保護要人組）遠距離護航，相當大陣仗。

日前英祿話過唔得閒見流亡海外嘅哥哥他信，尋日佢就以一襲紫色套裝出動掃貨，一行人先去百貨公司選購旅行篋，後又逛咗幾間女裝名店，佢更喺其中一間買咗四件貨品，埋單至少幾萬元。已為人母嘅英祿不時搭住囝囝膊頭而行，但囝囝似乎鍾意手上嘅遊戲機多啲。