政壇：搞搞政：中港矛盾 網民「殺錯良辰」

中港矛盾未見紓緩，日前立法會富貴黨議員田北俊以旅遊發展局主席身份發言，明確反對取消內地一簽多行政策，認為對真正嘅遊客有影響，呢句說話引起一啲網民不滿，認為現時內地客蜂擁來港現象已經吃不消，有群組就發起「反一簽多行，罷買G2000」行動，批評田少發錢寒，要香港人陪葬，聲言要罷買G2000添。

嘩，罷買？行動一旦發起真係可大可小喎！有心水清嘅網民就即時留言提醒，話G2000係田少細佬、新民黨副主席田北辰名下嘅公司，唔係田北俊o架。但有網民就話，總之佢哋兩兄弟名下嘅商品都要抵制，以表示港人強烈不滿喎。

田氏兄弟雖然同在商界及政壇發展，但田二少今次無喇喇中槍，仲係誤中副車添，佢有乜回應呢？田二少就坦言冇咩回應，只係無奈留低一句：「殺錯良民。」