政壇：辣招幫怪醫唔使捱貴租

政府日前推出「加辣招」打擊樓價，包括多項首次針對工商舖嘅措施。醫學界立法會議員怪醫梁家騮尋日自爆，佢可能係得益者之一，因為佢喺中環太子大廈嘅診所就嚟要續約，聽聞業主喺辣招推出後，都唔敢獅子開大口，最後可能加幾成租就算數。

怪醫喺一○年離開公立醫院轉為私人執業，同年年中為診所簽訂租約，當時金融海嘯嘅後遺症仍未完全消退，市道未算太瘋狂，所以租金只須九十蚊一呎，成間診所差唔多月租八萬幾蚊，仲叫負擔得嚟，但年尾續約，最壞打算係會倍倍聲咁加。不過，政府再出辣招後，怪醫探聽過業主嘅最新口風，相信最多都係加幾成，否則做多十幾次手術都唔夠交租。