政壇：蘇澤光自我檢討做好啲

唔少港人都鍾意冬天出外滑雪，貿易發展局主席蘇澤光（Jack蘇）今年揀咗距離北京三個鐘車程嘅新滑雪場試玩。Jack蘇話，佢並非首次到內地滑雪，而今次去呢個滑雪場又新又平，價錢只係日本滑雪嘅一半，加上又唔使每次都排隊等二十幾分鐘喎！

掌舵貿發局嘅Jack蘇不時留意外間對該局嘅睇法，最近有兩篇評論文章講到貿發局嘅存廢問題。Jack蘇力撐，話雖然大家有言論自由，但不應譁眾取寵，又指「叫貿發局關門」嘅講法唔公道。至於有評論話本港已經冇工業，貿發局或冇存在必要，佢坦言貿發局唔係工業發展局，凡係有利本港發展，貿發局都會引為己任，好似物流、電影、資訊科技等範疇。佢話貿發局呢類組織，好難連牛頭角順嫂都識，所以只能自我檢討做好啲。