政壇：陳克勤怒插白鴿仔屈票

沙田區議會田心選區補選競爭激烈，拉票手法各出奇謀。繼民主黨候選人丁士元喺隆亨邨掛起一幅九米長嘅橫額，被人投訴涉嫌違反有關選舉宣傳品規例後，尋日又被指「出術」，借民建聯立法會議員陳克勤嚟宣傳。克勤已即時向選管會投訴，但丁士元就話，今次純屬同事無心之失，一時冇留意後面嗰張橫額，佢事後已同克勤「沙冧」（道歉），話下次會多加留意。

網上流傳一張相片，內容係有張寫住「支持丁士元」字樣嘅橫額豎立喺克勤嘅橫額前面，但又遮剩克勤個頭，令選民誤會克勤支持對手參選，懷疑此舉有心屈票。克勤批評，對手呢個做法係誤導選民，認為想贏就應該公道啲，唔好出埋啲「那渣招」。

直至上星期，選舉事務處就有關補選收到十多宗投訴，主要跟選舉廣告有關。今次補選候選人還包括公民力量潘國山、人民力量林匡正及新青年民主幹線蘇佩琳。