政壇：陳雲生老貓燒鬚

從政者對時事反應敏捷，第一時間抗議、表態往往可以爭取民心，趁機攞分，民建聯屯門區議員陳雲生同支部成員尋日就喺中電公布業績、兼話未來幾年要大幅加電費後翌日，隨即拉隊去抗議，搶飲頭啖湯！點知喺地區政壇打滾二十幾年嘅陳雲生卻老貓燒鬚，竟然帶隊去咗旺角亞皆老街舊中電總部，抗議摸門釘都夠搞笑喇，仲要事後打電話搵人飛的士嚟接信，真係瘀到爆！

建仔屯門支部呢個請願活動其實有晒部署，但就做唔足功課囉。事關尋日朝早本嚟有個中電嘅新春酒會，但陳雲生等杯葛，下午就專程拉大隊去中電總部抗議，佢哋大喊「強烈要求中電擱置加價申請」、「市民慘慘慘」等口號，原本係威係勢。

職員飛的接信

只可惜中電喺去年中已將總部由旺角亞皆老街遷往紅磡海逸道，陳雲生一行人卻懵然不知，尋日去到舊中電總部時，都仲未發覺去錯地方，一眾人嗌完一輪口號，見冇人出來接信先覺得有問題，急急打電話去中電搵人，呢個時候先發覺摸門釘。中電方面唔敢得失啲政黨，特別派職員由紅磡新中電總部「飛的」過旺角舊總部接收請願信。

死撐切合原意

問到陳雲生係咪搞錯時，佢跌落地揦拃沙，解釋話中電將來會喺舊總部地皮發展房地產，正正切合佢哋要求中電應該將部分地產收益撥入「電費穩定基金」嘅建議，所以先至去中電舊總部請願喎。既然係咁，佢哋點解事前又冇約定中電職員去舊總部接信呢？死撐只係呃到自己啫，呃唔到人嘅。