SUN搞作：少膽蟲手記：霸氣80後

嗱！嗱！嗱！咪話少膽虫事後孔明，少膽虫幾時都話啲80後好有霸氣，編輯阿Kiss就係表表者，點解咁講？少膽虫唔直接答你，而用例子答你。

自從阿Kiss遞信話唔撈，淫賤黎出面挽留佢都要企硬辭職之後，呢個阿Kiss好似大帝上身，鍾意做乜就做乜，早兩日仲帶個私家keyboard返公司用，搞到啲女同事都覺得佢好有型，喺呢個陽盛陰衰嘅編輯部處處留情，少膽虫仲有肉食嘅？少膽虫即刻叫阿Kiss拎埋個keyboard入淫賤黎房，大數佢不是。

「阿Kiss，你做咩帶個私家keyboard返公司？」淫賤黎問。阿Kiss撥一撥長髮話︰「咁又有咩問題呢？」淫賤黎一聽，嗰人好似醍醐灌頂咁，反問少膽虫︰「係喎！有咩問題呢？」

咁樣被人問一問，少膽虫當堂都唔知點答，口窒窒咁講咗句︰「亂……亂……插……插電腦，好容易火燭o架！而且編輯一日要打幾多字啫，使唔使用私家鍵盤咁架勢啊，計我話最緊要係帶個腦返工！」火燭呢啲咁嘅藉口，都畀少膽虫諗到，睇阿Kiss呢鋪點兜！

點知阿Kiss先用不屑嘅眼神睥咗少膽虫一眼，然後嘟長個嘴講︰「你識啲咩呀！」阿Kiss再撥撥佢執前陰話︰「《爛果》係sell老作，啲記者寫得唔夠爆，編輯梗係要加鹽加醋，分分鐘仲要幫佢重作，一日起碼打成千字！所以身為一個鍵盤戰士，用私家鍵盤係好合理嘅。」

淫賤黎聽到呢度，猛咁點頭，阿Kiss仲要加多句︰「所以我都係嗰句，帶keyboard返工－無關係！」雖然阿Kiss佔盡上風，但少膽虫點會咁易認輸︰「但係老細，火燭嘅問題仍然未解決喎。」淫賤黎又低頭沉思。

呢個時候，阿Kiss突然高舉佢個keyboard，大力扑向淫賤黎……張枱。一聲如雷貫耳嘅粉碎聲，嚇到少膽虫同淫賤黎跌咗落地下，阿Kiss一句︰「咁依家你哋滿意未？」講完就轉個身行出去，阿Kiss揮一揮衣袖，不帶走佢個keyboard……

呢吓身影，真係成個舊時嘅霆鋒咁有霸氣！試問少膽虫點可以唔寫個服字呀？