政壇：政商定格：劉燕卿四圍搵消費專家

本港消費者委員會前總幹事劉燕卿（Connie）去年過檔聯合國，出任消費者保障國際顧問專家小組主席，日前本地春茗活動上，就見啱啱喺外地公幹回港嘅Connie一身紅裝現身，佢透露上任後遇到嘅首個難題，就係要喺世界各地物色十二個專家，共商修訂保障消費者指引。下個月佢又要到內地及杜拜開會。

Connie話，雖然世界咁大，但請「一打」專家並非易事，依家暫時只請到來自英國、美國、日本、巴西、馬來西亞幾位專家，仲需繼續努力搵喺消費、法例、全球經濟發展等範疇有一定認識嘅人。問Connie由消委會「升呢」到聯合國感受如何？佢即謙稱唔敢講「升呢」，仲講笑話自己做咗外母就真係「升呢」嘞！咦，唔通佢囡囡要嫁﹖Connie就話唔會畀壓力囡囡，一切順其自然喎。