政壇：搞搞政：葉禮德嘆「無糧」會長難做

香港律師會早排做咗個內部諮詢，會長葉禮德（Dieter）發信諮詢會員對會長支薪嘅意見，尋日佢同傳媒茶敍時好緊張咁澄清，話只係想會員喺五月會員大會畀吓意見，就算支薪嘅建議通過咗，都唔會適用於本屆會長。即係話葉禮德只係種樹嘅人，享受唔到呢個成果，但講起呢份「無糧」會長嘅工作，佢就認為支薪真係：「多多錢都唔夠呀！」

葉禮德話，會長原來好多嘢做，佢過去七、八個月擺咗超過一半時間落律師會職務，自覺對生意拍檔同屋企人都唔多公平，所以即使會長受薪都好合理。

至於幾多錢人工先足以補償？佢就認為「多多錢都唔夠」，原因係陪屋企人嘅時間係無價嘅。不過佢都好坦白咁話，其實只做一年會長時間太短，難有作為。咁任滿之後會否尋求連任？佢就即刻推老婆出嚟擋，要睇吓老婆會否詐型喎！