政壇：英祿訪港無檔期見他信

泰國總理英祿‧西那瓦尋日抵港進行為期兩日嘅官式訪問。我哋經常影到英祿嘅哥哥他信喺香港飲茶購物，咁英祿訪港會唔會同流亡海外嘅哥哥喺香港會面呢？英祿話到明喺香港期間佢好忙，唔會同哥哥見面。

英祿同囝囝先去南韓，參加南韓首個女總統朴槿惠嘅就職典禮後就嚟咗香港。有外國報章見到我哋嘅報道，提到兩兄妹可能喺香港見面，於是直接去問英祿，英祿親口答話唔會嘞！呢啲係咪國事為重，家事放一邊呢？不過兩人唔把握機會喺香港碰碰頭，真係有啲可惜。原來英祿喺短短兩日嘅香港之旅，活動排得密麻麻，首先要去禮賓府同CY進行雙邊會談，此外仲要同香港嘅銀行家、旅遊業界等見面、交流，今晚就要返泰國。咁趕，原來曼谷下月舉行市長選舉，佢趕住返去主持大局。