政壇：行會好多人無份傾辣招

政府上周五再向熾熱樓市推出六辣招，事前行政會議臨時臨急召開咗個特別行政會議，我哋聽聞淨係申報利益環節，已經用咗十五分鐘，而且最少有四名成員包括查史美倫、李國章、張學明同林健鋒，因有利益衝突需要避席，仲要喺另一間房呆坐三粒鐘，同外界斷絕通訊，等到會議完畢至「放監」。

自從舊年林奮強被爆涉嫌偷步賣樓後，行會成員真係見過鬼都怕黑，利益申報做得好認真。而且今次會議保密工夫做得好足，聽聞一眾行會成員都要去到開會嗰一刻先知係傾新辣招。結果家族做緊地產生意嘅查史美倫、身兼九倉董事嘅李國章、建築公司新昌非執董林健鋒，同埋擁有大量新界土地兼手持唔少物業投資公司嘅張學明都申報利益，避席會議。期間佢哋喺另一間房，連打電話都要叫行會秘書代打，以防機密資料外洩。

行會中百足咁多爪嘅陳智思理應避席，但嗰日佢無去到開會，咁啱避過唔使呆坐。行會成員葉劉淑儀仲話，就算開完會成員都未走得，因為當時財爺曾俊華未對外公布措施，佢哋惟有齊齊「留堂」，直至財爺開完記者會至可以散水，行會秘書處都算有人情味，喺留堂時提供三文治同墨魚丸等小食，等大家就算悶親都唔好餓親。