政壇：曾鈺成預言 政壇是非多

新一年伊始，特首梁振英同一眾高官尋日赴立法會嘅新春午宴，大家蛇年首度聚頭，一舉一動都對日後嘅行政立法關係有啟示。立法會主席曾鈺成尋日就變身預言大師，攞住蛇年嘅蛇大玩特玩，佢認為蛇無論喺中、西方嘅形容詞中都係負面居多，又同傳媒話蛇年是非多，有是非即係有料寫……是非皆因人作怪，唔通，議會喺蛇年將會爭拗不絕、是非滿天飛？

曾鈺成尋日以主人家身份招待政府官員，致詞時，佢嘅主題就係蛇。佢話今年係蛇年，本來想講啲同蛇有關嘅祝賀語，不過佢做功課時，搵嚟搵去都搵唔到，發現啲成語唔係虎頭蛇尾、蛇蠍心腸，就係蛇鼠一窩、龍蛇混雜。

曾：冇是非會好悶

研究完一輪，佢發現中國人似乎對蛇冇咩好感，然後走去睇西方嘅，點知西方文化原來都一樣。曾鈺成繼續晒佢嘅發現，好似伊索寓言就有農夫同蛇嘅故事，比喻恩將仇報；《聖經》故事都係講蛇引誘夏娃令人類墮落，講到尾，蛇嘅形象真係唔多正面。

不過曾鈺成都兜番，覺得蛇都唔係唔好嘅，佢解釋︰「如果冇蛇嘅話，夏娃同亞當就淨係望吓望吓、無所事事、衫都唔着，幾冇趣呢？有蛇先有是非，冇是非嘅話會好悶，傳媒又冇嘢做。」所以中國人將蛇列入十二生肖都係一種智慧喎。

佢呢個因為蛇而令到亞當夏娃走出唔着衫、無所事事世界嘅說法真係幾搞笑，但佢明言有蛇就有是非，就似乎意有所指，配合番年初二支下籤，且睇香港今年係咪是非年！