SUN搞作：少膽虫手記：少膽虫請人

少膽虫見近日大批員工炒咗淫賤黎，決定請多幾個人，今日少膽虫就（扮）好有霸氣咁落咗會議室面試喇。少膽虫覺得自己都算係好老腫，相信班新人見到，都會爭先恐後咁入《爛果》。

少膽虫見有三個新人喺會議室門口，一個長髮着黑絲、一個西裝筆挺，最後嗰個成個浪子咁，着住件哲古華拉tee。少膽虫見到靚女，梗係急不及待call佢入去會議室「詳談」啦。問到點解要入辛聞界，靚女話：「唔豬呀，人哋諗試吓做o架咋……」少膽虫見到靚女，邊度記得人地講咗啲乜吖，對眼淨係顧住（目及）嘢，靚女未講完，少膽虫已經連嗌兩聲「好！」，心諗呢個請硬。

第二個闊少行咗入黎，少膽虫見佢扮晒靚仔，有威脅佢係《爛果》男神嘅地位之虞。問番第一個問題，靚仔竟然朗誦：「我細細個就聽過《爛果》，好崇拜黎生。今日見到閣下威風凜凜嘅英姿，令我大為感動，請施予拙子一個機會……」少膽虫見條闊少盛讚淫黎，覺得佢好假，但聽到人地奉承自己，又不禁鬆毛鬆翼。

呢刻少膽虫諗住扑錘請人，但嗰位着住哲古華拉tee既少年一場嚟到，都唔差在敷衍吓佢。少膽虫求其問番第一條問題，少年眼神露出絲絲光芒：「香城實在太多不平等……我決定用辛文維護社會公義，企喺弱者嗰邊，打倒霸權！」聽到呢度，少膽虫睡意當堂無晒，諗起當日喺學堂畢業，一直深信辛文係社會公器，點知十幾年之後做嘅係奴才。眼前呢位看似充滿夢想嘅少年，喚起咗少膽虫好多回憶。究竟請邊個好呢？呢刻少膽虫真係決定唔到。