SUN奇古怪：Sun潮語【龜速】

香港呢個城市不嬲出名快，行路快、講嘢快、食飯快、做嘢快、升得快、跌得快，起樓快、拆樓快，忘記過去仲快！喺呢個城市生活，所有事都以超高速度新陳代謝，呢頭係全城熱話，一眨眼就已成明日黃花。頭先至全城哀悼，轉個頭就嘭嘭聲放煙花慶祝。最近，政府見上年十月出辣招打擊樓市無效，樓價不跌反升，加上唔知係咪畀拆售酒店呢單嘢激親，即刻快速再推幾招辣招再度打擊炒樓活動。不過市場普遍認為，呢啲所謂辣招，其實都係得啖笑！啲樓價只會以「龜速」下跌一排，轉個頭又升番到IFC咁高！你同我對住啲樓都係一樣，睇得到，買唔到！

潮語「龜速」意思非常之易明，就係照字面解，即係龜嘅速度咁解，係形容一啲人做嘢或者事情真係慢過隻龜。「龜速」最初係一啲網民用嚟形容上網速度，如果你仲係用緊電話線上網或者無光纖覆蓋，用電腦上網就會相當之慢，Load一頁嘢都要十世先Load到，咁就係「龜速」。尤其係打網上電腦遊戲，如果你屋企網速慢，真係好影響遊戲表現，更會拖累隊友。例如打戰爭遊戲時，人人動作快夾爽，但係你就以「龜速」Slow-Motion移動，真係好冇癮。

「龜速」後來就被廣泛使用，成為慢嘅同義詞。例如鬧人啲車慢可以咁講：「龜速嘅法拉利？不如搭電車啦，阿叔！」當然做嘢慢都絕對可以用「龜速」去形容，例如話人諗嘢慢可以咁話：「你呢啲龜速腦，就唔好學人撈廣告啦！」其實，普通話都有句類似「龜速」嘅詞語叫「牛步」，因為牛嘅步伐都係行得好慢。不過睇番香港社會，咩都快但硬係有樣嘢真係「龜速」，呢樣嘢咪就係民主普選之路囉，搞咗廿九幾年都係原地踏步……慢過龜！