政壇：搞搞政：葛珮帆被夫投訴唔顧家

進身立法會嘅議員新丁過去幾個月都領略咗議會工作嘅繁重，唔少人呻攞命，尋日輪到民建聯新丁葛珮帆，不過佢嘅方法就好間接，佢話畀老公投訴唔顧家，事緣佢老公喺農曆新年前趁佢外出時，就乘機換晒房間嘅窗簾，仲諗住一路唔出聲畀個驚喜佢，點知佢一直冇發覺，終於到年初一時，佢老公就忍唔住自爆呢個「驚喜」，葛珮帆之後先至補鑊走入房間大讚新窗簾，又慢慢左睇右睇。

葛珮帆尋日喺西貢同傳媒團拜，席間講吓最近嘅事，好自然講到畀老公投訴。佢一邊講，一邊忍唔住笑，仲話主要係因為新舊窗簾顏色好似，又呼籲大家應該留意多啲屋企嘅嘢喎。

講番個團拜，葛珮帆認真有心，雖然佢本身食素，要自備素菜，但係佢都搵咗啲風味盆菜畀大家食，另外又搵咗師傅預備圓籠年糕同茶果款客。講開呢個年糕認真唔嘢小，有成四、五十公斤重，又要蒸二十小時先至熟透，如果要切開佢時，都要兩個人夾手夾腳先至切得開。