政壇：何俊賢累高永文高攀

漁農界立會議員何俊賢（高佬賢）位於元朗嘅首個地區辦事處尋日開幕，除咗民建聯一眾領導及立會議員捧場外，入境處處長陳國基同食物及衞生局局長高永文都到場主禮，仲有近百名漁農業界好友出席，好笑嘅係唔少好友帶咗漁農產品做賀禮，有本地雞、豬、魚及有機蔬果等。

高醫生表示，魚有魚味、雞有雞味，尤其啲紅菜頭非常鮮甜，唔講仲以為佢推銷緊「本地有機食品嘉年華」。身高六呎三吋嘅高佬賢致歡迎辭之後，輪到高醫生，望到支咪咁高，身材較矮嘅高醫生都要校番低支咪，仲忍唔住笑話：「低啲、低啲、低啲」。