政壇：水貨客一樣困擾澳門

香港飽受水貨客問題困擾，原來澳門一樣如是。香港電台節目「香港家書」尋日嘅主角係澳門立法會議員吳國昌，何解會請個澳門議員嚟講澳門嘅社會情況呢？吳國昌喺封「家書」度話，自己八十年代喺香港中文大學崇基學院經濟系讀書嘅，可能呢個係佢其中一個同香港嘅淵源。

吳國昌話，澳門官方判斷嘅旅客承載力極限是二千九百萬人次，而當地去年以內地旅客為主嘅入境旅客總人次已超過二千八百萬人次，早突破承載力極限。過多嘅內地旅客破壞咗澳門社區環境，亦令居民愈來愈難取得日常服務同用品，民怨四起，批評澳門政府為咗經濟數字任由情況惡化喎，佢仲建議有同樣情況嘅香港可以同澳門聯手向中央反映咁話。