政壇：股壇長毛無稅狂想曲

新一份預算案仲有幾日就出籠，正版財爺鬍鬚曾未出風頭，「股壇長毛」獨立股評人David Webb尋日已急急腳「財爺」上身，喺佢個人網站發表首份「另類」財政預算案。一向主張自由市場經濟嘅David Webb當然同政府大唱反調，除咗提倡一刀切廢除印花稅外，更建議劃一稅階及稅率，年薪二十萬元以上嘅市民先需要繳納薪俸稅，稅率劃一百分之十四，咁大動作，仲懶理港府財政穩健，真係要贈呢個無稅「財爺」「瘋狂」兩字囉！

倡一刀切廢印花稅

向來言行出位嘅David Webb早前為抗衡《公司條例》限制公眾查冊嘅條文，一度喺網上公布千幾個包括政商界名人嘅身份證號碼，今次嘅另類預算案亦「語不驚人誓不休」。David Webb認為，香港有今日全靠自由市場經濟，為帶領偏離軌道嘅香港重回正軌，佢提倡政府放棄資助或以任何形式干預一切商業活動。

David Webb曾經高調炮轟政府推出買家印花稅（BSD）及加強額外印花稅（SSD）屬「違憲及帶歧視性」，當然唔放過喺預算案撤銷印花稅嘅機會，指出收取印花稅原意係英國三百幾年前向法國宣戰嘅藉口，喺現代社會繼續推行根本唔入流，更影響市民買賣物業嘅意欲，理應一刀切撤銷。其餘「瘋狂」措施包括豁免汽車首次登記稅，停止兩元乘車優惠及擴展學券制度至全港所有學校。

呢位瘋狂「財爺」噏得就噏，有冇諗過每年幾千億元嘅政府開支由邊個埋單呢？政府呢頭先預告來年度經常性開支將會大增，股壇長毛呢頭就拋份咁「自由奔放」嘅預算案，引到香港人流口水之餘，唔知會唔會令鬍鬚曾睇到眼冤呢？