烽火台：貪曾介紹行為偽術

嗨，我是貪曾，大家都說我精通語言偽術，其實這種說法太睇小我了。實情是，本貪官將中西偽術共冶一爐，不但懂得語言偽術，還懂得行為偽術。

先講語言偽術這筆，最關鍵是要懂得擘大雙眼。呢，去年傳媒踢爆我乘坐富豪遊艇遊澳門，我為了撇除利益輸送嫌疑，隨口鬥噏已經支付市值船票。詎料海事處一查之下，揭發付錢之說子虛烏有，搞到個個都話我「擘大眼講大話」。其實對本貪官來說，「擘大眼講大話」可是莫大的恭維啊！超，講大話咪講大話咯，吹咩！

至於行為偽術，竅門無非八個字，台上一套，台下一套。台上人模人樣，台下貪婪腐敗，回歸前替英國人當奴，回歸後聽到國歌都眼濕濕，對着北大人唯唯諾諾，對着富豪嘻皮笑臉。猶記當日廉政專員湯仔已屆退休之年，我任人唯親，特事特辦，讓他破例續約三年，與我共同進退，一起周遊列國，分頭攀附權貴，大小便宜，公私好處，貪得就貪，舐得就舐，嘻嘻，呵呵……

有人問我，你成日講大話，怕唔怕好似木偶奇遇記咁長鼻哥呢？其實，長鼻哥自有長鼻哥的好處，可以幫我聞清楚邊度有銅臭味、邊度有油水揩。實在覺得阻手阻腳時，就用菜刀切一截落嚟，用嚟撩錦鯉又得，用嚟加埋政協進貢嘅葵花雞炒餸亦得，得咗！