SUN搞作：打橫嚟講：香港法治還剩多少

一早就話咗呢個香港旅遊業議會好廢o架啦！懶有嘢咁喝令搞臭香港形象的「世通假期」老闆出嚟解畫，人家係賤啫，但唔係傻o架！點會聽你班廢柴支笛，蒲頭捱轟吖！反正，淨係一個春節嘅生意，據報已袋成千萬矣！睬你都白癡啦！釘佢牌？哈哈！咪開過第二個牌頭，繼續搵銀囉！攞個新牌有幾難？

香港廢柴政府的公眾形象，被庸官帶領下，由上層貪曾煲呔起至今，唔係腐敗撒謊，就係庸碌殘缺，最叻欺善怕惡，胡作妄為，大亂朝綱……

法治是香港核心價值的最後一道防線，但看到最近香港警方和法庭的判決，已到叫人心寒的地步，例如，那個不足二十一歲的小女孩在去七一遊行期間被阻，與女警拉扯，最終被控「咬傷警務人員」，收押二十一天後，再判入更生中心，不準保釋。按法律，如果正式起訴這小妹妹，其家人便可保釋她待審，甚或，即使罪成判刑，有熟法例的人士估計頂多受一個月，扣番她已還押的二十一日，可當庭釋放，但法庭無咁做，遂被人質疑全心玩嘢，製造政治白色恐怖，叫家長及新一代社運青年睇辦！如果真係咁，香港法治還剩下多少呢？

最奇怪的，這位小妹妹由被押第一天起，至今，香港法律界，尤其是立法會內！有律師牌的議員們，沒有一件出過聲，說半句人話，大狀黨諸公，何俊仁、涂謹申死晒去邊？你哋仲對得住法理的公義嗎？今日不站出來，將來站不了出來！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府