政壇:搞搞政:袋巾傑阿Paul玩鬥遲發言

立法會建制派同泛民主派鬥法各出奇謀,但最近竟然連發言都鬥埋,喺辯論議案時鬥最遲發言。有「公民黨打手」之稱嘅阿Paul謝偉俊最近就同公文袋「袋巾傑」梁家傑大鬥法,大家都要等對方先發言,之後再乘勢發言反駁對方,等對方冇仇報,而佢哋亦對鬥遲發言直認不諱。

不過,阿Paul話呢個方法並非萬試萬靈,好似前日辯論贊唔贊成引用《權力及特權條例》調查全國政協委員劉夢熊嘅言論,因為代主席梁君彥最後只係問咗一次「仲有冇議員要發言?」就隨即宣布中止辯論環節,搞到佢舉唔切手冇得講嘢喎。

正因為兩人經常鬥遲發言,搞到主席曾鈺成要特別(目及)實佢哋兩個,試過忍無可忍下,就提醒佢哋發言前唔該早啲撳掣,唔好搞到臨尾先舉手要求發言。

其實曾鈺成未做主席前都經常同支聯會前主席司徒華鬥遲發言,有泛民議員仲曾經話曾鈺成係「秘密武器」,到依家反而要為議員鬥遲發言而煩惱,唔知呢啲係咪叫做「現眼報」呢?

第一手消息請下載on.cc東方互動iPhone/iPad/Android/Windows Phone Apps

設計圖片及對白