政壇：楊釗新正頭同田少開年

尋日中華總商會團拜，外號「牛仔褲大王」嘅中總會長楊釗等核心成員齊現身拜年。對於日前商界立法會議員田北俊公開批評特首CY梁振英「冇料到」，又話商界同CY關係麻麻，楊釗就暗寸田少話：「牢騷發得多，對自己身體都冇好處！」又話商界批評政府嘅態度要善意、唔好有針對性，咁樣對雙方都有利。

楊釗話香港既然已選出CY做特首，大家就唔好再糾纏落去，「譬如話選咗我做會長，我都未做，你就話我唔得，好唔fair（公平）啫！」佢坦言，中總對CY首份施政報告好滿意，認為已抓住施政大方向，希望大家公平啲，畀啲時間特首做嘢喎。