貪曾醜聞一周年 公義未伸恨綿綿

前特首曾蔭權爵士被踢爆貪盡海陸空，歎盡省港澳，唔經唔覺一年過去，點解仲繼續逍遙法外，究竟係天無眼，定係廉政公署有眼無珠，咁大個貪官都唔識捉？

尋日，即係東方報業集團揭發貪曾醜聞一周年，正義市民莊先生向廉署舉報，除咗舉報貪曾涉嫌收受利益，仲舉報前廉政專員湯顯明包庇貪曾。嗱，公義未伸吖嘛，廉署查貪曾軟手軟腳吖嘛，結果連廉署前一哥都淪為市民心目中嘅貪腐嫌疑犯，睇嚟香港塊廉潔招牌都快晚節不保咯！

貪曾被舉報收受利益，湯顯明被舉報包庇貪官，追源溯始，已經係一年前嘅孽帳。上年二月十八日，東方報業獨家踢爆貪曾夫婦現身澳門江湖飯局，乘坐城中富豪遊艇吃喝玩樂三日兩夜，消息震驚全城，為貪曾連串貪腐醜聞曝光揭開序幕。當時貪曾為咗逃避接受款待罪名，話畀咗五百蚊「船費」喎，點知海事處最近完成調查，證實貪曾擘大眼講大話。

報案人莊先生係咁講嘅，貪曾貴為特首，接受富豪款待，有「曾商勾結」、收受利益之嫌，衝擊香港廉潔核心價值，所以佢要挺身而出舉報。至於湯顯明咯喎，打骰廉署期間未有主動調查貪曾，直到有政黨舉報至立案調查，擺明官官相衞，存心放生貪曾。

廉署以前打老虎雷厲風行，調查貪曾呢隻跛腳鴨居然慢手慢腳，話唔埋真係有人官官相衞，意圖將案件拖到不了了之軟着陸。大家唔好忘記，湯顯明係貪曾一手安插入廉署，○九年仲鬼鬼祟祟續任三年添，任期啱啱同貪曾共同進退，話無景轟都無人信啦！

講開包庇貪曾，嫌疑犯其實點止湯顯明。貪曾自己講，北大人本來搵佢做全國政協，係佢自知畀廉署調查緊至唔做咋。大家話嘞，北大人幾關照貪曾吖！可圈可點嘅係，雖然貪曾名落政協名單，湯顯明卻榜上有名，全國政協淪為藏污納垢之所，北大人對貪腐嫌疑犯情有獨鍾，唔怪得有恃無恐逍遙法外啦。

全國政協以污糟邋遢論英雄，雖然冇咗貪曾啫，不過仍然有其他貪官同奸商，土豪惡霸蠱惑仔亦唔少，形象都好難洗得乾淨咯。

貪曾醜聞一周年，唔止係貪曾為官失德嘅恥辱標誌，亦係廉署工作失敗嘅恥辱標誌。現任廉政專員白韞六如果唔想步湯顯明後塵被人舉報，如果唔想香港嘅廉潔招牌消失，快快打老虎啦！