SUN搞作：智弱網聞：鍵盤戰士現真身

近嚟，有一啲網民開始質疑鍵盤戰士到底係咪真係代表正義。有人話，今時今日嘅鍵盤戰士，已經唔再係好似以前咁，為不公不義發聲，對抗建制惡鬥權貴，反而變咗一班聯群結黨蝦蝦霸霸，郁啲就起人底仲覺得自己巧威威嘅小學雞。

咁又係嘅，依家上網咁容易，好多小學雞都已經用緊銀河筆記本２，仲要無限上網。任由一班心智未成熟嘅人變身做keyboard rangers，後果真係可以好大鑊，網絡上日日腥風血雨，到時人哋話要管制網開一面，就大條道理。

嗱，小編就覺得，係時候重新定義咩叫網絡戰士嘞。真正嘅keyboard rangers，應該行精英制，好似恐龍戰隊咁，連埋後期加入嘅白戰士，六丁友都夠拯救地球啦。仲有吖，真正嘅keyboard rangers，應該要勇於現真身，唔好剩係匿係個mon後面。今日我哋就搵咗兩位真正嘅網絡戰士做個示範畀大家睇。嗱，要拯救香港，至少都要咁啦！