政壇：政商定格：猛人齊撐陳智思家人畫展

行政會議成員Bernard陳智思聯同母親陳沈時芬同姪女舉辦自家出品嘅「陳氏三代藝術展」尋日舉行開幕禮，冠蓋雲集，陳氏一家成功請到粒粒政壇巨星撐場。

陳老太習畫四十幾年，畫展當然由陳老太擔大旗，而Bernard九幅自創塗改液點畫新作似乎係「臨急抱佛腳」而成，連佢都直言不諱得四個月時間籌備，平時唔開畫展，佢都唔願拎起塗改液創作點畫，唔怪得喺毫無靈感下，惟有點幅喺佢時任古物諮詢委員會主席時，掀起評級風波嘅舊政府總部西座，佢睇見自己幅「劣作」都眼冤，寧願收倉都唔想拎出嚟喎！