政壇：搞搞政：想賣是非屋白鴿黨難洗底

舊年夏天，東方報業集團踢爆民主黨喺太子恒利商業大廈嘅總部業權不清，該黨立法會議員何俊仁同李永達係持有總部物業SOUND FACTOR嘅股東，但兩人都無向立會申報利益。再揭落去，發現黨總部原來唔係黨產，最初係商人于品海嘅物業，後來至轉咗畀何俊仁、李永達等持有嘅公司，而民主黨亦有向間公司交租，租金去向不明。白鴿黨可能見個總部問題多多，周身唔聚財，最近想細屋搬大屋順便甩難，不過間屋咁多麻煩，想甩難都唔係咁易喎。

立會前議員「肥仔明」李華明尋日搞團拜時透露，該黨決定賣咗間是非屋，喺同一地段改買一個面積大一倍嘅單位做黨總部。查實該黨黨團召集人單仲偕兩年前都提過要賣咗間總部，改買一間大啲嘅寫字樓，但礙於當時唔少黨友認為黨應該留番啲錢去選區議會加立法會，所以最後冇成事。呢兩年樓價飛漲，白鴿黨換樓都失晒時機啦，學肥仔明話齋，同區現時一個四千幾呎嘅單位要成三千幾四千萬咁多，恒利總部現時巿值差唔多有二千萬，賣咗舊單位後應夠錢畀新單位首期。

但白鴿黨仲有好多疑團未解喎，根據土地註冊處資料，恒利總部早喺九九年「供滿」，該黨根本就唔使再交租，咁究竟咁多年嚟交租嘅錢去晒邊？到底有冇人中飽私囊？喺輿論壓力下，何俊仁同李永達終於公開最初持有間樓嘅神秘人身份，佢就係非黨員嘅商人于品海，但佢哋就拒絕詳細交代于品海嘅持股量同其他股東身份，成件事仍不甚了了。想甩身，解晒啲疑團至得。

另外，白鴿黨打算細屋搬大屋，但係成個黨都喺度萎縮緊，要咁大個地方養老鼠咩？