政壇：男版蔣麗芸舌戰長毛

社民連「長毛」梁國雄再次喺立法會舌戰建仔，但今次對象係「男版蔣麗芸」馬恩國。

話說馬恩國尋日以香港專業人士協會副主席身份喺立法會政制事務委員會發言，被長毛踢爆佢冇申報係建仔黨員，又冇申報係政協後，佢即時上身，話自己雖然做山西省政協，但又係澳洲大律師，仲用英文話自己有大學學位，但長毛無。

跟住長毛再次踢爆佢應徵副局長失敗，馬恩國繼續用新加坡式英語反駁長毛，話自己「I got the potential，you don't」（我有潛質，你無），長毛再插佢點解一個律師可以咁講嘢，點知對方回敬佢一句「我唔係律師，我係大律師！」就係呢一句，當場有唔少人都笑咗。講到愛國，馬恩國用英文話長毛唔係中國人，當中夾雜咗粗口字。兩人用英文互罵五分鐘，最慘係身為委員會主席嘅譚耀宗唔能夠趕黨友離場，只能叫佢收聲。

馬恩國唔好忘記，建仔立會議員陳鑑林同梁志祥都無大學學位，唔通佢想退黨？