政壇：李嘉誠基金會邀六大師講學

喺資訊科技日新月異嘅年代，資訊科技教育好重要。由李嘉誠基金會出資主辦嘅「與大師同行」訓練營活動，今年就請咗六位來自英、美頂尖學府同科研機構嘅國際電腦生物學與醫學專家去到汕頭大學，同八十二個來自全國二十五個省市嘅高中精英學生對話。

負責統籌活動嘅耶魯大學終身教授兼汕頭大學校董林海帆就話，希望個活動可以啟迪呢班年輕人對科研嘅興趣，引領佢哋探索科研嘅領域。

主題為「信息技術與未來醫學」嘅訓練營活動於尋日舉行，六位大師級學者聚首汕大，佢哋都係各個科研範疇嘅頂尖專家，除咗醉心科研之外，亦十分熱切參與今次嘅活動。今次活動唔少高中學生都把握機會向佢哋請教科研心得。有關活動仲得到教育部同廣東省人民政府支持。