政壇：IQ博士睇淡股巿三輸

近日恒指升勢強，蛇年首個交易日紅盤高開，收報二萬三千幾點。但我哋收到風，話中總嘅立法會前議員「IQ博士」黃宜弘喺上屆立會會期曾經講過，話自己睇淡恒指走勢，未來將會跌穿一萬五千點。當時佢仲同白鴿黨「高達」李永達開咗個賭局，邊個輸咗就請對方食餐飯。結果「IQ博士」輸咗牙骹、輸咗餐飯，最慘係錯失咗入市良機，認真係「三輸」。

願賭服輸，有「酒仙」之稱嘅IQ博士遵守承諾，請咗高達、單仲偕等成圍枱食飯，仲請大家飲咗兩、三斤靚茅台添！

上海放煙花十幾個鐘

點解IQ博士當初會睇淡恒指呢？佢大笑幾聲之後回應話，當時係有「專業人士」分析畀佢聽，佢仲信到十足十，估唔到跌到一地眼鏡碎。佢嘆謂：「輸咗餐飯就事小啫，因為信錯咗佢而冇入貨，嗰下損失就大咯！」

唔知佢口中嘅「專業人士」，憑乜嘢作出呢個判斷，搞到佢損失慘重？抑或係對方只係隨便講吓，講者無心但聽者有意？咁今年會唔會再接再厲開賭局？佢即耍手擰頭咁話唔會喇，寧願齋請老友食飯，都唔敢再預測個股市。

雖然錯失入市良機，但家底豐厚嘅佢都係一笑置之。現時身在上海嘅佢話，每年農曆新年都會去上海度假兼過節，事關佢喺當地有間靚屋住。佢大讚上海嘅新年氣氛比香港濃厚十幾倍，香港嘅煙花匯演放得嗰二十幾分鐘，上海市民就放足十幾個鐘。無他嘅，上海放煙花合法o架嘛。佢退咗休近半年，話依家疊埋心水歎世界，過得好開心喎！本來佢就係酒仙，依家就快活過神仙喇！