私隱準則混亂 政治花瓶添怨

有趣有趣真有趣，有人挑戰私隱條例，喺網上公開大批市民身份證號碼，私隱專員公署畀人明剃眼眉，今鋪市民一定要擘大雙眼（目及）到實，睇吓呢隻無牙老虎點樣反擊。

有「股壇長毛」之稱嘅獨立股評人David Webb又有新搞作，一口氣公開千幾名市民嘅身份證號碼，包括多名超級富豪。佢話係因為不滿政府修例限制公眾查閱公司註冊紀錄嘅董事個人資料，所以要進行網上抗爭。

咁搞法，容乜易你爆我又爆，市民仲有私隱嘅？嗱，私隱公署一如所料打晒官腔，話會主動展開調查，又警告將身份證個人資料放上網，或者會牴觸私隱條例喎。不過有律師就話，呢種做法唔涉及侵犯個人資料，並冇違法喎。

嗱嗱嗱，一個話可能牴觸法例，一個話冇違法，究竟點算先？千幾個市民有名有姓有埋身份證號碼，個人資料任睇唔嬲，好似畀人剝咗光豬，如果咁都話冇事，私隱條例同私隱公署收檔都得咯！

查實，私隱條例一向混亂，毫無準則，連私隱公署本身亦係怪胎，畀人稱為政治花瓶。政府當年立例並且成立公署，話就話為咗保護市民私隱，但咁多年來私隱公署不務正業，無事生非，已淪為對付傳媒，打壓新聞自由嘅政治工具。呢，最典型例子就係當年一宗打壓東方報業集團嘅冤案嘞。

九七年九月，東方原刊物《東周刊》刊登一輯香港女士街頭服飾嘅相片，介紹最新時尚潮流。私隱公署聲稱接到其中一位相中人投訴，不問情由大興問罪之師，告周刊侵犯私隱，東方據理力爭，花費龐大人力財力物力打咗兩年官司，最終討回公道，獲法庭裁定上訴得直，狠狠摑咗私隱公署一巴。

話時話，私隱公署除咗拉大旗做虎皮打壓正義傳媒，多年來涉及高層假公濟私嘅醜聞更加係罄竹難書，佢哋其身不正，旨意該署保障市民私隱，好難咯。好似當年八達通公司出賣逾二百萬市民私隱圖利咁，到頭來咪又係高高舉起，輕輕放下。私隱公署保官不護民，供養呢個政治花瓶，簡直係浪費納稅人嘅金錢。

無論點都好，今次千幾名市民私隱畀人擺上網，究竟有冇觸犯條例，唔該私隱公署執正嚟做，查清查楚，千祈唔好學海事處咁，連曾蔭權爵士有冇坐「白牌船」咁簡單嘅事都要查一年吖，叮！