SUN搞作：少膽虫手記：節流就係咁簡單

尋日，少膽虫同大家上咗課開源節流，不知大家有冇得着呢？如果冇，唔使驚，少膽虫再同大家補補課，就用例子教吓大家。

少膽虫一向秉承《喪報》精神，梗係繼續喪逗利是。不過，經過初一至初六嘅蹂躪，唔少人都已經元氣大傷，所以匿得就匿，避得就避，成個編輯部，影都冇個。但少膽虫身經百戰，一早就捕喺（車立）度，做「（車立）神」，試問成班懶蟲點走得甩。

呢個時候，少膽虫離遠見到淫賤黎行過嚟，而（車立）門又閂緊，少膽虫靈機一觸，知道擦鞋嘅機會又嚟，即刻施展一招「卡斯拿斯飛撲」，由（車立）嘅左下方撲過去右上方，仲要拖長尾音，大叫︰「老……細…………」呢一幕「虫撲（車立）」盡映入淫賤黎眼簾，只見淫賤黎入到（車立）低頭，強忍唔笑，少膽虫就知呢鋪掂喇！嚟口就講︰「老細，恭喜發財！利……」

話未講完，淫賤黎面都黑埋咁問︰「年初一唔係畀咗你喇咩？」少膽虫心中一怯，好彩轉數夠快︰「老細，今日係我生日，咁……」平時傻吓傻吓嘅淫賤黎，度縮起上嚟真係好精，「我記得你好似唔係呢個月生日！」少膽虫見大話穿煲，腳都震埋，好在今日係初七，少膽虫衝口一句︰「老細，今日係初七人日呀！」少膽虫一招釜底抽薪，試問淫賤黎點可以唔畀，「好，好，生日快樂！分啲股畀你喇！」淫賤黎終於要從左邊口袋拎咗封利是畀少膽虫。

少膽虫返入房，第一時間拆咗封利是，一睇張相，兩個圓滑嘅球體真係睇到少膽虫眼都凸埋，一張淫賤黎親筆簽名「股票」，節流原來就係咁簡單，淫賤黎嗰套，少膽虫服晒！