SUN奇古怪：Sun潮語【頂癮】

未必淨係煙酒之類嘅物體先會令人上癮，世間上好多嘢都會令人上癮。買嘢會買上癮，溝女會溝上癮，打機會打上癮，打飛機就更加會上癮。有啲人甚至分手都會分上癮！嗰啲友仔會經常自我沉溺於分手嘅痛苦中，覺得自己係全宇宙最可憐，從而得到快慰，真係有人有鋪咁嘅自虐癮。

不過最近令香港人甚至全球集體上癮嘅，莫過於手機遊戲Candy Crush！依家响任何公眾地方，都會見到人用智能手機嗰度捽糖果，甚至新正頭去拜年，姨媽姑姐一年一度寒暄兩句，利是交易完畢後就各自坐埋一邊嗰度捽機。呢啲虛擬糖果，真係比全盒上面嗰啲更吸引，真係「頂癮」！

潮語「頂癮」嘅意思係同「癮」查實無乜關係，但好多人唔知咩係「頂癮」呢句嘢嘅來源，真係同「癮」有咩關係。「頂癮」嘅意思係形容一啲嘢新奇古怪得嚟又幾有趣，例如奧巴馬跳騎馬舞，就可以用「頂癮」嚟形容。又或者你幻想吓如果，有套戲叫《西遊3之Die Hard取西經》，由Bruce Willis拎住支槍去打牛魔王，女主角係舒淇，應該都會幾「頂癮」。

「頂癮」同「過癮」用法上都幾類近，而兩個詞嘅來源都同「癮」有關。話說某些有另類不良嗜好嘅人，當啲癮起嘅時候，但又唔夠錢滿足需要。於是就會問人乞住些少，又或者買少少分量頂住啲「癮」，但求有一剎那嘅快感。「過癮」亦係一樣，當然「過癮」嘅快感係大過「頂癮」。之後就傳吓傳吓，有啲唔知頭唔知路嘅人，就將「頂癮」用作潮語。好……文行至此，又係時候拎部手機出嚟，打番幾鋪Candy Crush頂吓癮！