政壇：搞搞政：鬍鬚曾預算案冇得攞威

財爺鬍鬚曾過去幾年做預算案諮詢前夕，例必會搞幾次「大龍鳳」，指定動作係宣傳片，最嚇人嘅係佢喺一○至一一年度嘅宣傳片中扮「攝青鬼」聽意見，一一至一二年就攞埋自己留鬚嘅特徵出嚟，呼籲市民「留意見唔使留鬚嘅」，事後當然被人狂惡搞啦。舊年就搵埋歌星林子祥大唱數字歌，被批評搬出大堆數字，天花亂墜，令預算案失去重點。

除宣傳片外，佢過去三年仲製作漫畫書呼籲市民畀意見。仲記得有立法會議員○九年時睇唔過眼，問政府鬍鬚曾呢系列嘅宣傳用咗幾多錢，發現當年製作漫畫書用咗三十三萬元，製成電視短片同播放廣告就用咗四十萬元，再加埋其他開支，淨係製作同廣告費用咗七十四萬元，呢條數年年累積嘅話認真襟計。

今年就冇呢支歌仔唱，佢亦冇得做短片男主角，事關預算案同施政報告用同一個網頁宣傳，只係維持事前推出短片提醒大家邊度有得攞預算案。

係囉，與其搞咁多嘥錢嘅無謂嘢，倒不如實際啲考慮係咪「派糖」回應市民訴求好過啦！